Sara Soto Gorlizen (Bizkaia) jaio zen 1941ean, baina bera txikia zelarik, bere familia Irunera bizitzera joan zen. Gaitz muskular bat medio, oso mugikortasun mugatua izan zuen gaztetatik. Sentikortasun handiko emakumea zen, eta musikaz gain, artearen beste eremuetan ere barneratu izan zen. Marrazketa, pintura eta literatura landu zituen, bereziki poesía. José Antonio Canoura maisuarekin harmonia ikasi zuen. Musika konposizioaren alorrean autodidakta izan zen.
Era askotako musika legatua du. Bere lehen obrak musika herrikoiaren baitan kokatzen dira. Ez dok amairu mugimenduaren eragina izan zuen, Lourdes Iriondo eta Xabier Leteren oso lagun egin baitzen, eta ondorioz Sarak gitarraz lagunduta abestiak konposatu zituen.
1974an, Artezi diskografikoarentzat Lourdes Iriondok “Maitasun honek zugan dirudi” grabatu zuen, eta Xabier Letek bere zenbait obrei hitzak jarri zizkien, esate baterako “Begi sakonak” eta “Lur erre hau baino haratago”. María Ostizek 60. hamarkadaren amaieran ezaguna egin zuen “Kanta kanta” abestiaren euskarazko letrak Xabier Leterenak dira ere. Txomin Artolak, 1979an “Martintxo” obra grabatu zuen Xoxoa diskografikoarentzat. Album honetan Txominekin batera Sara berak eta haren iloba Sara Isabel Basterretxeak abestu zuten.
Bere musika ibilbidea babestu zuten lagunez inguratua zegoen Sara Soto. José Antonio Canouraz gain, Fernando Etxepare korurako musika alorrean sartu zuen zuzendariak eta Ricardo Requejo pianistak, konposizioaren alorrera sartzera animatu zuten. Orduan, 70. hamarkadaren amaieran, jatorriz Bermeokoa zen Nestor Basterretxea eskultorearen “Serie Cosmogónica Vasca”-rako musikaren enkargua jaso zuen. Izaera garaikidea duen “Karraxis”poema korala izan zen emaitza, Basterretxearen bertsoetan oinarritua zegoena. Obra hau, 1979ko urtarrilaren 23an estreinatu zen Donostiako Victoria Eugenia Antzokian, Irungo Ametsa Abesbatzareneta Donostiako Orfeoiko kideen eskutik, Fernando Etxepareren zuzendaritzapean.
Nestor Basterretxearen beste obra batean oinarritu zen “Cripta”(1984-85) konposatzeko. Organo lan honetarako Nestor Basterretxeak Arantzazuko Basilikako kriptarako egindako muraletan inspiratu zen. Jose Manuel Azkue organista ospetsuak pieza hau askotan interpretatu izan zuen.
80. hamarkadan, Bizkaiko Abesbatzen IX. Astean, 4 ahots nahasietarako “Inguma”obra estreinatu zen Bilboko Begoñaren Basilikan. San Anton Orfeoiak interpretatu zuen Alfredo Hurtado de Sarachoren zuzendaritzapean.
Obra hauek guztiez gain, abesbatzarako obrak ere utzi ditu: “Cuatro canciones vascas”,“Elurretako Printzesak”, “Gure margo eder horiek”, “Martintxo”, “Txori bat bezala” eta “Nafarroako azken erreginak donapauleun” bakarlari eta 4 ahots nahasietarako.
Irunen hil zen Sara 1999ko ekainaren 28an.
