Eragiyok abesbatzako ahotsak Lekuona Fabrikan izango dira Musikasteren Egunean
• -Koruek oso gaizki pasatu dute pandemian zehar, zer esan nahi du zuretzat jendearen aurrean berriro aritu ahal izateak?
• Egoera oso zaila izan da, gure jarduera hainbat hilabetez mugatuta egon delako eta proiektu asko eten dituelako. Abesbatzok bagenekien gure entseguak eta jarduerak onartzen ari ziren beste jarduera asko bezain seguru egin genitzakeela. Zorionez, uztailean eszenatokietara igo ginen berriro, nahiz eta oraindik edukiera mugatuta egon. Orain berriro egitea eta oraingo honetan % 100eko edukierarekin izatea beste urrats bat da normaltasuna berreskuratzeko.
• Nola animatuko zenioke jendeari kontzertura joatera?
• Musikasteren koral eguna euskal musika koralaren festa handia da. Kontzertu berean lau talde hain profil desberdinekin ikusi ahal izatea publikoa kontzertura joateko balio behar duen pizgarria da.
• Zer esan diezagukezu Musikasteren aurtengo edizioan garatu beharreko programari buruz?
• Gure kasuan, hitzordu garrantzitsua izanik, mimoz hautatu ditugu interpretatuko ditugun gaiak. Araguen familiaren bi lan aukeratu ditugu: Tomas Aragues Bayarteren ‘Ene emaztea/Joan nintzen Ainoara’ eta Tomas Aragues Bernaden ‘Oi lore maitea’. Gure kontzertuari amaiera emateko, Luis Aranbururen ‘Alkar-izketan’ interpretatuko dugu. Arabako musikagilea oso ezaguna da, ‘Kitolis’ lanaren egilea delako, baina, hala ere, ‘Alkar-izketan’ ez da oso ohikoa. Musikasteren lehen edizioan egon ziren Oleskariak eta Ertizka otxoteen grabazioak baino ez ditugu ezagutzen. Horrela, omenaldi txiki bat egiten diegu lehenengo edizioan parte hartu zuten talde horiei, eta gure egiten dugu Musikaste sortzeko helburuetako bat, gutxi interpretatutako piezak publikoari aurkeztea.